• youtube YouTube
  • twitter Twitter
  • facebook Facebook
  • spotify Spotify
  • LastFM Last.fm
  • myspace MySpace

Discografía

Kosmogonías

2010, Berro Guetto Música

Berrogüetto aproxímase á ciencia para achegarnos o seu universo e súa filosofía. Convídannos a parar e mirar cara arriba.

"Desde que a primeira pinga de intelixencia brillou na humanidade, a nosa especie non deixou de abraiarse da magnífica visión do espazo e, civilización tras civilización, xamais deixou de xerar mitos, lendas, cosmogonías que poetizaban o movemento dos astros e a súa propia existencia. Porén, cada paso que dá a ciencia, cada novo descubrimento, á vez que derruba antigas crenzas inconsistentes, parece que acentúa en vez de minguar esa sede creativa, esa necesidade de transmutar a emoción en novas melodías." Quico Comesaña

Kosmogonías, lévanos ao momento de partida por excelencia, ao Big-Bang, ao triunfo da materia sobre a antimateria, ao berro inicial do universo que coa súa radiación chega ata nós. Kosmogonías é unha reflexión entre a humanidade e o universo, unha chamada chea de optimismo cara a consecución dun sistema de organización máis xusto. Berrogüetto párase e destaca todas aquelas vontades colectivas ou individuais que cos seus xestos e actitudes traballan para mellorar a súa contorna.

Composto por once cancións, Kosmogonías mantén o estilo tan persoal e definido por Berrogüetto desde os seus comezos. Innovadores desde o primeiro traballo, este quinto disco supón unha colección de sons orgánicos, un traballo delicado onde se plasma a alma do grupo a través da súa especial concepción musical.

En Kosmogonías achamos dúas novidades importantes: unha nova voz e un son novo. A incorporación de Xabier Díaz, habitual colaborador da formación, supón a aposta de Berrogüetto por unha voz solista masculina, feito pouco común entre os grupos galegos. Intégrase tamén no grupo a nickelharpa, un instrumento de corda, orixinario do folclore sueco e similar en aspecto a unha zanfona. Este en concreto foi construído de maneira artesanal por Quim Farinha, violinista do grupo e lutier.

É necesario destacar e agradecer tamén as colaboracións dos escritores Rosa Aneiros e Manuel Rivas, quen cedeu un dos seus poemas para a letra de "Alalá da noite".

  • 1
    Alalá da noite [4:34]
      Letras
    Música: Quico Comesaña / Xabier Díaz Letras: Manuel Rivas
  • 2
    Astrea [2:18]
     
    Música: Quico Comesaña
  • 3
    Igneominea [4:22]
     
    Música: Anxo Pintos
  • 4
    Líridas de abril [4:20]
      Letras
    Música: Tradicional/ Xabier Díaz / Guillerme Fernández Letras: Tradicional / Xabier Díaz
  • 5
    Planeta Can [5:06]
     
    Música: Quim Farinha
  • 6
    Cantar de Camiño [4:53]
      Letras
    Música: Tradicional/ Xabier Díaz / Guillerme Fernández Letras: Tradicional / Xabier Díaz
  • 7
    Nadir [4:38]
     
    Música: Santiago Cribeiro / Guillerme Fernández
  • 8
    Danza de Meirol [4:23]
      Letras
    Música: Tradicional/ Xabier Díaz / Guillerme Fernández Letras: Tradicional / Xabier Díaz
  • 9
    Ataque de jota [5:02]
     
    Música: Santiago Cribeiro
  • 10
    Caneta de poeta [4:28]
      Letras
    Música: Xabier Díaz / Guillerme Fernández Letras: Xabier Díaz
  • 11
    Esfericantus [4:34]
     
    Música: Anxo Pintos