• youtube YouTube
  • twitter Twitter
  • facebook Facebook
  • spotify Spotify
  • LastFM Last.fm
  • myspace MySpace

Discografía

10.0

2006, Berro Guetto Música

Un Berrogüetto consolidado cumpre dez anos reinventándose constantemente. Un traballo optimista que aborda os problemas do mundo para calquera oído.

"Berrogüetto é o nome da subversión en contra do acomodaticio e do rutineiro. É a procura dun alén no decorrer das horas de traballo honesto e sincero, na beleza agochada no trasluz da constancia. Berrogüetto é o nome da minuciosidade puntillística, do fino encaixe de harmonía e tempo, da áxil melodía que non se contenta coa súa galanura e alza os ollos para enxergar horizontes máis azuis e máis amplos. Hai agora dez anos que estes artistas viñeron a convulsionar o mundo folk cun discurso diferente e engaiolante." Rodrigo Romaní.

10.0 é o cuarto disco de Berrogüetto, enteiramente autoeditado e só coas colaboracións íntimas de Kin García e Silvia Pintos. O traballo reflecte a evolución persoal da banda como factoría de ideas e a propia duns músicos que sempre rexeitaron producir por producir. Berrogüetto celebraba o seu décimo aniversario presentando ao público a súa intimidade sen demasiadas palabras arredor da música.

Un traballo optimista que aborda os problemas do mundo para calquera oído. É o traballo máis acústico da banda, con viaxes evocadores como "Cracovia" ou "Brest" e apostas influenciadas pola música contemporánea, dende o jazz ao pop.

Esteticamente a banda segue transcendendo da música e apoiándose en case todas as disciplinas converxentes. O deseñador galego Fernando Lema é autor da imaxe do disco e as fotografías son de Karlos Abal.

A xira do espectáculo 10.0 foi un rotundo éxito, levando o "son Berrogüetto" por todo o mundo. O grupo reafirmaba o seu directo coma unha baza de tan impoñente calidade coma o seu traballo de estudio, que xa fora honrado con numerosos galardóns.

Unha volta e un poema [3:30]

Música e letras: Guadi Galego / Guillerme Fernández
Vai unha volta, unha volta e un poema
Unha cantiga, a cantiga dunha nena
Vai un xantar, un xantar, unha conversa
Un pensamento, pensamento con talento

Vai o teu beixo, o teu beixo nun silencio
Unha palabra, a palabra desexada

E agora que sae o sol
o teu nome xa se ve
Agora que sae o sol
ti tamén es

Vai a esquecida, a esquecida e nomeada
Unha sentenza, a sentenza que ti fagas
Vai o teu dito, o teu dito cun sorriso
Unha quimera, a quimera dunha espera

Foi unha volta, unha volta e un poema
Unha cantiga, a cantiga dunha nena,
Vou despedirme, despedirme cunha flor
Vou despedirme, cunha flor de cor de ron.